இலங்கையின் எதிர்க்கட்சித் தலைவரும் ஐக்கிய மக்கள் சக்தியின் தலைவருமான சஜித் பிரேமதாசவின் சொத்து மற்றும் கடன் விவரங்கள் தொடர்பான புதிய தகவல்கள் வெளியாகியுள்ளன.

2023ஆம் ஆண்டின் 9ஆம் இலக்க ஊழல் ஒழிப்புச் சட்டத்தின் கீழ் சமர்ப்பிக்கப்பட்ட அவரது சமீபத்திய சொத்து மற்றும் பொறுப்புகள் தொடர்பான பிரகடனத்தில் இந்தத் தகவல்கள் இடம்பெற்றுள்ளதாக IBC தமிழ் செய்தி வெளியிட்டுள்ளது.

இந்த விவரங்கள் இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்குழுவான CIABOC இன் இணையதளத்தில் வெளியிடப்பட்டதாகவும், இணையதளம் பின்னர் புதுப்பிக்கப்பட்டு சொத்து விவரங்களைப் பார்வையிடும் வசதி மீண்டும் வழங்கப்படும் எனத் தெரிவிக்கப்பட்டதாகவும் BBC செய்தியை மேற்கோள்காட்டி அந்த அறிக்கை குறிப்பிடுகிறது.

நிதிச் சொத்துக்களில் ஏற்பட்டுள்ள மாற்றம்!

சஜித் பிரேமதாசவின் சொத்துக்களில் குறிப்பிடத்தக்க மாற்றங்கள் எதுவும் இல்லையெனக் கூறப்பட்டாலும், அவரது நிதிச் சொத்துக்களின் மதிப்பு குறைந்துள்ளதாகத் தெரிவிக்கப்பட்டுள்ளது.

2025ஆம் ஆண்டில் 29.6 மில்லியன் ரூபாவாகப் பதிவாகியிருந்த நிதிச் சொத்துக்கள், புதிய அறிவிப்பில் 23.5 மில்லியன் ரூபாவாகக் குறைந்துள்ளதாகக் குறிப்பிடப்பட்டுள்ளது.

18 தனிநபர் கடன்கள் – வெளியான முக்கிய தகவல்!

முந்தைய சொத்து மற்றும் பொறுப்புகள் அறிக்கையில் 20 கடன் பொறுப்புகள் குறிப்பிடப்பட்டிருந்தன. எனினும், அவற்றின் கடன் வழங்கியவர்களின் விவரங்கள் அப்போது பொதுமக்களுக்குத் தெளிவாக வெளியிடப்படவில்லை.

ஆனால், புதிய அறிக்கையில் கடன் வழங்கியவர்களின் விவரங்கள் வெளிப்படுத்தப்பட்டுள்ளதாகத் தெரிவிக்கப்பட்டுள்ளது.

அதன்படி, சஜித் பிரேமதாச மொத்தமாக 18 தனிநபர் கடன்களைப் பெற்றுள்ளதாகவும், அவற்றில் 17 கடன்கள் லக்ஷ்மன் டி பொன்சேகா என்பவரிடமிருந்து பெறப்பட்டுள்ளதாகவும் குறிப்பிடப்பட்டுள்ளது.

825 இலட்சம் ரூபாவைத் தாண்டிய கடன்!

லக்ஷ்மன் டி பொன்சேகாவிடமிருந்து பெறப்பட்ட கடன்களின் மொத்தப் பெறுமதி 825 இலட்சம் ரூபாவைத் தாண்டியுள்ளதாக அந்த அறிக்கையில் தெரிவிக்கப்பட்டுள்ளது.

மேலும், ஹெர்பர்ட் ஜெயகொடி என்பவரிடமிருந்து 8.4 மில்லியன் ரூபா பெறுமதியான மற்றுமொரு கடனும் பெறப்பட்டுள்ளதாகக் குறிப்பிடப்பட்டுள்ளது.

இந்தக் கடன்கள் 2006ஆம் ஆண்டு முதல் 2024ஆம் ஆண்டு வரையிலான காலப்பகுதியில் பெறப்பட்டதாகத் தகவல்கள் தெரிவிக்கின்றன.

கடன் தவணைகள் தொடர்பிலும் தகவல்!

குறித்த கடன்கள் அனைத்தும் திருப்பிச் செலுத்தப்பட வேண்டிய பொறுப்புகளாகக் குறிப்பிடப்பட்டுள்ளன. இருப்பினும், அவற்றில் எந்தவொரு கடனுக்கும் இதுவரை ஒரு தவணை கூட செலுத்தப்படவில்லை என அந்த அறிக்கையில் சுட்டிக்காட்டப்பட்டுள்ளதாக IBC தமிழ் தெரிவித்துள்ளது.

சஜித் பிரேமதாசவின் சொத்து அறிவிப்பில் இடம்பெற்றுள்ள இந்தப் புதிய கடன் விவரங்கள் தற்போது அரசியல் மற்றும் பொதுவெளியில் கவனத்தைப் பெற்றுள்ளன.