கடமை அறையில் துப்பாக்கி சூட்டிற்கு இலக்காகி மரணமடைந்த தேசிய புலனாய்வு பிரிவு உத்தியோகத்தரின் சடலம், பிரேத பரிசோதனைக்காக கல்முனை அஸ்ரப் ஞாபகார்த்த வைத்தியசாலையிலுள்ள பிரேத அறைக்கு கொண்டு செல்லப்பட்டுள்ளது.

நேற்று (வெள்ளிக்கிழமை) மாலை, அம்பாறை மாவட்டம்- கல்முனை தலைமையக பொலிஸ் நிலைய பகுதியில் அமைந்துள்ள தேசிய புலனாய்வு பிரிவு காரியாலயத்தில், 21 வயது மதிக்கத்தக்க புலனாய்வு உத்தியோகத்தர் ஒருவர்,  தன்னைத் தானே துப்பாக்கியால் சுட்டு தற்கொலை செய்துகொண்டிருந்தார்.

இந்நிலையில் சம்பவ இடத்திற்கு இரவு 9 மணியளவில், கல்முனை நீதிமன்ற பதில் நீதிவான் தாஹா செய்னுதீன் சென்று, விசாரணை மேற்கொண்டார். அதனைத் தொடர்ந்து குறித்த சடலத்தை கல்முனை அஸ்ரப் ஞாபகார்த்த வைத்தியசாலைக்கு, பிரேத பரிசோதனைக்கு கொண்டு செல்லுமாறு உத்தரவிட்டார்.

இவ்வாறு உயிரிழந்தவர் யாழ்ப்பாணம்- வடமராச்சி கரணவாய் மத்தி பிரதேசத்தைச் சேர்ந்த 21 வயதுடைய புலனாய்வு பிரிவு உத்தியோகத்தரான கே.கமலராஜ் என்பவராவார். இவ்விடயம் தொடர்பான மேலதிக விசாரணைகளை கல்முனை பொலிஸார் மற்றும் புலனாய்வு பிரிவினர் மேற்கொண்டு வருகின்றனர்.