மனிதனுக்கு பிராணவாயு போலவே வீட்டின் வடகிழக்கு மூலையும். ஒரு வீட்டில் வடகிழக்கு மூலை சரியாக அமைந்து விட்டால் அந்த வீட்டில் பிரச்சனைகளும் குறைவாகவே இருக்கும் என சாஸ்திரங்கள் கூறுகின்றன.

அதுவே ஒரு வீட்டின் வடகிழக்கு மூலையானது தவறான அமைப்பில் இருந்தால் அந்த வீட்டில் தொடர் பிரச்சினைகள், சுபகாரியங்களில் தடை மற்றும் கடன் தொல்லைகள் நிச்சயம் இருக்கும்.

வடகிழக்கு ஏன் வாஸ்துவில் முக்கியமாக பார்க்கப்படுகிறது தெரியுமா? ஒரு வீட்டின் வடகிழக்கு மூலையில் தான் செல்வத்தையும், அவர்களுடைய ஆடம்பர வாழ்க்கையையும் சுட்டிக் காட்டுகிறது.

அதாவது ஒருவர் நன்றாக இருக்கிறாரா? அவர்களுக்கு வருமானம் தடையின்றி வந்து கொண்டிருக்கிறதா? என்பதை வடகிழக்கு மூலை தான் எடுத்துக் காட்டுகிறது என்பதை நினைவில் வைத்துக் கொள்ளுங்கள்.

ஒருவர் ஜாதகத்தில் குரு எவ்வளவு முக்கியமோ, அதே போல தான் ஒரு வீட்டின் அமைப்பிலும் வடகிழக்கு என்பது குருவை போன்றவர். குரு பார்வை இல்லை என்றால் ஒரு வீட்டில் சுபகாரியங்களும், நல்ல விஷயங்களும் நடப்பதில்லை.

அதுபோல தான் வடகிழக்கு மூலையும் சரியாக அமையாவிட்டால் கடன் தொல்லைகளும், பொருளாதாரப் பிரச்சினைகளையும் எதிர்கொள்வார்கள்.

வடகிழக்கு மூலையில் இருக்கக் கூடாத விஷயங்கள் என்ன, அதை எப்படி அமைத்துக் கொள்ள வேண்டும் என்பதை நாம் தெரிந்து வைத்துக் கொள்வது அவசியம்,

வடகிழக்கு மூலையில் நீர் சம்பந்தப்பட்ட விஷயங்கள் இடம் பெற்றிருப்பது சிறப்பானது. அந்த இடத்தில் தலைவாசலுக்கு நேர் எதிரே இருக்கும் படியான சூழ்நிலை அமைந்திருந்தால் அடியில் நீர்த்தேக்க தொட்டிகள், கிணறுகள் போன்றவை அமைத்திருக்கிறோம் என்றால் அந்தத் தொட்டியின் மீது ஏறி தான் தலைவாசலை மிதிக்க வேண்டும் என்ற நிலையில் அமைந்திருந்தால் அந்த வீட்டில் வீட்டின் தலைவர் வாழ முடியாத ஒரு சூழ்நிலை ஏற்படும். அத்துடன் மனைவியுடன் இருக்க முடியாத நிலைமை உருவாகலாம்.

அடுத்த படியாக, கடன் தொல்லை கழுத்தை நெறிக்கும் அளவிற்கு தள்ளிவிடும். மேலும் அந்த இடத்தில் உயரமான மரங்களை வளர்க்க கூடாது. வட கிழக்கு பகுதி பள்ளமாகவும் இருக்கக் கூடாது. இதனால் வீட்டில் சுபகாரியங்கள் நடைபெறுவதில் பிரச்சனைகள் உண்டாகும்.

அதே போல் நீருக்கு உரிய இடமான வடகிழக்கு பகுதியில் நெருப்பு சம்பந்தப்பட்ட விஷயங்களை அமைத்து இருந்தாலும் மிகப் பெரிய பாதிப்புகளை உண்டாக்கும். அந்த இடத்தில் சமையலறை வரக்கூடாது. இதனால் வீட்டின் வாரிசுகள் பாதிக்கப்படுவார்கள். செல்வநிலை வெகுவாக குறைந்து விடும் சூழ்நிலை உருவாகலாம்.

தோஷங்களை நீக்கவல்ல குரு பகவான் உச்சம் பெற்றிருந்தால் தோஷங்கள் நீங்கும். எனவே வடகிழக்கு குரு பகவானுக்கு உரிய இடமாக இருப்பதால் மற்ற திசைகளை விட வடகிழக்கு திசையை நீங்கள் சரியாக அமைத்து விட்டால் மற்ற திசைகளில் இருக்கும் தோஷங்களை இறை வழிபாடுகள் செய்து சுலபமாக நீக்கி விட முடியும்.

இதனால் தான் வடகிழக்கு திசை இந்த அளவிற்கு முக்கியத்துவம் கொடுக்கப்படுகிறது. உங்கள் வீட்டின் வடகிழக்கு மூலையை சரியாக அமைத்துக் கொள்ளுங்கள்.

அந்த இடத்தில் அதிக கனமான பொருட்களை வைக்காமல், குறைவான கனமுள்ள மற்றும் நீர் சம்பந்தப்பட்ட விஷயங்கள் வருமாறு பார்த்து சரியாக அமைத்துக் கொண்டால் உங்களுக்கு இருக்கும் வாஸ்து தோஷம், கிரக தோஷம் அனைத்தும் நீங்கி குருவின் அருளால் கடன் பிரச்சினை இல்லாமல் நிம்மதியாக வாழ முடியும். சுப காரியங்கள் தடை இல்லாமல் கைகூடும் என்பதே நிதர்சனம்.