கடற்படை மருத்துவமனையில் அனுமதிக்கப்பட்டிருந்த கஞ்சிபானை இம்ரான் மீண்டும் பூஸா சிறைச்சாலைக்கு மாற்றப்பட்டுள்ளார்.

உணவு தவிர்ப்பு போராட்டம் காரணமாக ஏற்பட்ட நோய் நிலைமை அடுத்து அவர் பூஸா கடற்படை மருத்துவமனையில் நேற்று முற்பகல் அனுமதிக்கப்பட்டிருந்தார்.

இந்தநிலையில் அவருக்கு மருத்துவமனையில் ஈ.சி.ஜி பரிசோதனைகள் முன்னெடுக்கப்பட்டதன் பின்னர் அவர் மீண்டும் பூஸா சிறைச்சாலைக்கு மீண்டும் மாற்றப்பட்டுள்ளதாக தெரிவிக்கப்பட்டுள்ளது.

அதேநேரம், போதை பொருள் வர்த்தகம் தொடர்பில் குற்றச்சாட்டப்பட்டுள்ள பாதாள உலகக்குழு உறுப்பினரான பொடி லெஸி மற்றும் வெலே சுதா உள்ளிட்ட சில கைதிகள் முன்னெடுத்த உணவு தவிர்ப்பு போராட்டம் தொடர்வதாக அறிவிக்கப்பட்டுள்ளது,

முன்னதாக 40 கைதிகள் உணவு தவிர்ப்பு போராட்டத்தில் ஈடுபட்டிருந்த போதிலும் அவர்களில் 13 பேர் தற்போது போராட்டத்தை கைவிட்டுள்ளனர்.

தொலைபேசி வசதிகள், அவர்களை பார்வையிட வரும் சட்டத்தரணிகளுடன் உரையாடுவதற்கு அதிக நேரம் வேண்டும் எனவும், வழக்கு விசாரணைகளுக்காக நீதிமன்றம் சென்று மீள சிறைச்சாலைக்கு திரும்பும் போது முன்னெடுக்கப்படும் பரிசோதனைகளை நிறுத்துதல் உள்ளிட்ட கோரிக்கைகளை முன்னிறுத்தி அவர்கள் போராட்டத்தில் ஈடுபட்டுள்ளதாக சிறைச்சாலைகள் திணைக்களத்தின் உயர் அதிகாரி ஒருவர் குறிப்பிட்டார்.