இந்தியாவில் கடந்த ஆண்டு மார்ச் மாதம் நாடு தழுவிய ஊரடங்கு அமல்படுத்தப்பட்டபோது விமான சேவையும் நிறுத்தப்பட்டது. அதன்பின் பல்வேறு வழிகாட்டுதல் நெறிமுறையுடன் மே மாதம் உள்நாட்டு விமான சேவை மீண்டும் தொடங்கியது. நவம்பர் மாதம் கொரோனா தொற்று வெகுவாக குறைய 70-ல் இருந்து 80 சதவீத இருக்கைகளுடன் உள்நாட்டு விமானங்கள் பறக்க மத்திய அரசு அனுமதி அளித்திருந்தது.

தற்போது இந்தியாவில் கொரோனாவின் 2-வது அலை விஸ்வரூபம் எடுத்துள்ளதால், பல்வேறு மாநிலங்கள் கட்டுப்பாடுகளை கடுமையாக்கியுள்ளன. விமான மூலம் வரும் பயணிகள் கட்டாயம் ஆர்டி-பிசிஆர் பரிசோதனை எடுத்திருக்க வேண்டும் என மாநிலங்கள் அறிவித்துள்ளன.

இதனால் விமானங்களில் பயணிகள் பயணம் செய்வது வெகுவாக குறைந்துள்ளது. ஆகவே, கொரோனா அதிகரித்த போதிலும், விமான நிறுவனங்களின் இழப்பை சரிகட்ட கடந்த 19-ந்தேதி 80 சதவீத இருக்கைகளுடன் விமானங்கள் பறக்க மத்திய அரசு அனுமதி அளித்திருந்தது.

என்றாலும் விமானங்களில் பயணிகள் எண்ணிக்கை அதிகரிக்கவில்லை. இதனால் 80 சதவீதம் என்ற நடைமுறையை மே 31-ந்தேதி வரை நீட்டித்துள்ளதாக மத்திய விமான போக்குவரத்துத்துறை மந்திரி ஹர்தீப் சிங் புரி தெரிவித்துள்ளார்.