யாழ்ப்பாணத்தில் மேலும் 3 பேருக்கு கொரோனா தொற்று உள்ளமை இன்று செவ்வாய்கிழமை கண்டறியப்பட்டுள்ளதாக வடமாகாண சுகாதார சேவைகள் பணிப்பாளர், மருத்துவர் ஆ.கேதீஸ்வரன் தெரிவித்தார்.

இன்றைய கொவிட் நிலவரம் குறித்து தகவல் வெளியிட்டுள்ள அவர்,

யாழ்ப்பாணம் பல்கலைக்கழக மருத்துவ பீட ஆய்வுகூடத்தில் இன்று 264 பேரின் மாதிரிகள் பிசிஆர் பரிசோதனைக்க உட்படுத்தப்பட்டது. அவர்களில் எவருக்கும் தொற்று இல்லை.

யாழ்ப்பாணம் போதனா வைத்தியசாலை ஆய்வுகூடத்தில் 465 பேரின் மாதிரிகள் பரிசோதனைக்கு உட்படுத்தப்பட்டன. அவர்களில் 3 பேருக்கு தொற்றுள்ளமை கண்டறியப்பட்டுள்ளது.

மன்னார் வைத்தியசாலையில் இருந்து யாழ்ப்பாணம் போதனா வைத்தியசாலைக்கு மாற்றப்பட்ட பெண் ஒருவருக்கு தொற்றுள்ளமை உறுதிப்படுத்தப்பட்டுள்ளது.

அவர் வைத்தியசாலை தனிமைப்படுத்தல் விடுதியில் சேர்க்கப்பட்டு பிசிஆர் பரிசோதனைக்கு உள்படுத்தப்பட்டார்.

யாழ்ப்பாணம் சிறைச்சாலையிலிருந்து விடுவிக்கப்பட்டு சுயதனிமைப்படுத்தப்பட்டிருந்த கைதி ஒருவருக்கு தொற்றுள்ளமை கண்டறியப்பட்டுள்ளது. அவர் யாழ்ப்பாணம் மாநகரில் வசிப்பவர்.

அத்துடன், பருத்தித்துறையில் குடும்பம் ஒன்றில் சிலருக்கு கொரோனா தொற்று ஏற்பட்ட நிலையில் சுயதனிமைப்படுத்தப்பட்டிருந்த 9 வயது மாணவிக்கு தொற்று உள்ளமை உறுதிப்படுத்தப்பட்டுள்ளது எனத் தெரிவித்துள்ளார்.