ஐ.பி.எல். கிரிக்கெட் : வெளியேற்றுதல் சுற்றில் ஐதராபாத்-பெங்களூரு இன்று மோதல்

ஐ.பி.எல். கிரிக்கெட் : வெளியேற்றுதல் சுற்றில் ஐதராபாத்-பெங்களூரு இன்று மோதல்

ஐ.பி.எல். வெளியேற்றுதல் சுற்றில் (எலிமினேட்டர்) ஐதராபாத்-பெங்களூரு அணிகள் இன்று மோதுகின்றன.


ஐ.பி.எல். கிரிக்கெட்டில் அபுதாபியில் இன்று (வெள்ளிக்கிழமை) நடக்கும் வெளியேற்றுதல் சுற்றில் புள்ளி பட்டியலில் 3-வது மற்றும் 4-வது இடம் பிடித்த அணிகளான முன்னாள் சாம்பியன் ஐதராபாத் சன்ரைசர்ஸ் அணி, பெங்களூரு ராயல் சேலஞ்சர்சை எதிர்கொள்கிறது. இந்த ஆட்டத்தில் வெற்றி பெறும் அணி இறுதிப்போட்டிக்கான 2-வது தகுதி சுற்றில் விளையாடும். தோற்கும் அணி போட்டியை விட்டு வெளியேறும்.

 


புள்ளிபட்டியலில் ஒரு கட்டத்தில் 7-வது இடத்தில் இருந்த ஐதராபாத் அணி கடைசியாக ஆடிய 3 ஆட்டங்களிலும் வரிசையாக வெற்றி பெற்று 3-வது இடத்துக்கு முன்னேறியது. இந்த மூன்று வெற்றிகளும் பிளே-ஆப் சுற்றுக்கு தகுதி பெற்ற டெல்லி, பெங்களூரு, மும்பை இந்தியன்ஸ் அணிகளுக்கு எதிராக கிடைத்தவை என்பது குறிப்பிடத்தக்க அம்சமாகும். இதில் மும்பையை 10 விக்கெட் வித்தியாசத்தில் பந்தாடியதும், தொடக்க ஆடடக்காரர்களான கேப்டன் டேவிட் வார்னரும், விருத்திமான் சஹாவும் அரைசதம் விளாசியதும் ஐதராபாத்தின் நம்பிக்கைக்கு உற்சாகமூட்டுகிறது.

பேட்டிங்கில் வார்னர் (4 அரைசதத்துடன் 529 ரன்), சஹா (4 ஆட்டத்தில் 214 ரன்), மனிஷ் பாண்டே (380 ரன்), வில்லியம்சன் (200 ரன்) பந்து வீச்சில் ரஷித்கான் (19 விக்கெட்), ஸ்விங் செய்வதில் கில்லாடியான சந்தீப் ஷர்மா (13 விக்கெட்), டி.நடராஜன் (14 விக்கெட்) ஆகியோர் ஐதராபாத்தின் ஆணிவேராக உள்ளனர். இவர்கள் ஜொலிப்பதை பொறுத்தே ஐதராபாத்தின் வெற்றி வாய்ப்பு அமையும்.

ஐதராபாத்துக்கு நிகராக உள்ள ஒரு அணி பெங்களூரு ராயல் சேலஞ்சர்ஸ். முதல் 10 ஆட்டங்களில் 7-ல் வெற்றிகளை குவித்த அந்த அணி கடைசி 4 ஆட்டங்களில் சறுக்கி பின்னடைவுக்குள்ளானது. ரன்ரேட் அதிர்ஷ்டத்தால் ஒரு வழியாக பிளே-ஆப் சுற்றை அடைந்தது.

இதுவரை ஐ.பி.எல். கோப்பையை வெல்லாத பெங்களூரு அணி அந்த தாகத்தை தணிப்பதற்கான முதற்படிக்கட்டு இந்த ஆட்டமாகும். பெரிய ஸ்கோரை எட்டுவதற்கு கேப்டன் விராட் கோலி (460 ரன்), டிவில்லியர்ஸ் (398 ரன்), தேவ்தத்படிக்கல் (472 ரன்) ஆகிய பேட்ஸ்மேன்களில் ஒருவர் நிலைத்து நின்று ஆட வேண்டியது அவசியமாகும். இவர்கள் 3 பேரும் சோடை போனால் பெங்களூரு நிலைமை கந்தல் தான். பந்து வீச்சில் சுழற்பந்து வீச்சாளர்கள் யுஸ்வேந்திர சாஹல், வாஷிங்டன் சுந்தர் கட்டுக்கோப்புடன் வீசி சிக்கனத்தை காட்டுகிறார்கள். ஆனால் வேகப்பந்து வீச்சில் 7 வீரர்களை பயன்படுத்தி பார்த்தும் சரியான வேகப்பந்து வீச்சு கூட்டணி இதுவரை அமையவில்லை.

இரு அணிகளும் சரிசமபலத்துடன் மல்லுகட்டுவதால் யார் கை ஓங்கும் என்பதை கணிப்பது கடினம். இவ்விரு அணிகளும் ஏற்கனவே சந்தித்த ஆட்டங்களில் முதலில் 10 ரன் வித்தியாசத்தில் பெங்களூருவும், 2-வது முறை 5 விக்கெட் வித்தியாசத்தில் ஐதராபாத்தும் வெற்றி பெற்றிருந்தன.

போட்டிக்கான இரு அணிகளின் உத்தேச பட்டியல் வருமாறு:-

ஐதராபாத்: வார்னர் (கேப்டன்), விருத்திமான் சஹா, மனிஷ் பாண்டே, வில்லியம்சன், பிரியம் கார்க், ஜாசன் ஹோல்டர், அப்துல் சமாத், ரஷித்கான், ஷபாஸ் நதீம், சந்தீப் ஷர்மா, டி.நடராஜன்.

பெங்களூரு: ஜோஷ் பிலிப் அல்லது ஆரோன் பிஞ்ச், தேவ்தத் படிக்கல், விராட் கோலி (கேப்டன்), டிவில்லியர்ஸ், கிறிஸ் மோரிஸ், ஷிவம் துபே, வாஷிங்டன் சுந்தர், யுஸ்வேந்திர சாஹல், முகமது சிராஜ், ஷபாஸ் அகமது அல்லது நவ்தீப் சைனி, உதனா.

இந்திய நேரப்படி இரவு 7.30 மணிக்கு தொடங்கும் இந்த ஆட்டத்தை ஸ்டார் ஸ்போர்ட்ஸ் சேனல் நேரடி ஒளிபரப்பு செய்கிறது.