2021ம் ஆண்டு வரவு செலவுத்திட்டத்தின் விளையாட்டுத்துறை அமைச்சுக்கான விவாதம் நேற்றைய தினம் நாடாளுமன்றில் நடைபெற்ற போது விளையாட்டுத்துறை அமைச்சரான நாமல் ராஜபக்ஷ சபைக்கு பிரசன்னமாகி இருக்கவில்லை.

சபை நடவடிக்கைகளுக்கு நாமல் ராஜபக்ஷ கலந்துகொள்ள மாட்டார் எனவும், அவர் சபைக்கு பிற்பகல் வேளையில் பிரசன்னமாவார் எனவும் சபாநாயகர் மஹிந்த யாப்பா அபேவர்தன அறிவித்தார்.

எனினும், நாமல் ராஜபக்ஷ பிற்பகல் வேளையிலும் சபைக்கு வருகை தராமையினால், எதிர்க்கட்சி உறுப்பினர்கள் நாமல் ராஜபக்ஷ குறித்து கேள்வி எழுப்பினர்.

எவ்வாறாயினும், நாமல் ராஜபக்ஷ சபை நடவடிக்கைகளில் இறுதி வரை கலந்துகொள்ளவில்லை.

இந்த நிலையில், சமூக ஊடகங்களில் வெளியான செய்தியை ஊடகங்கள் மேற்கோளிட்டுள்ளன.

நாமல் ராஜபக்ஷவின் உடற்பயிற்சி பயிற்றுவிப்பாளருக்கு, கொவிட் தொற்று ஏற்பட்டுள்ளமையினால், அமைச்சர் நாமல் ராஜபக்ஷ தற்போது தனிமைப்படுத்தலில் உள்ளதாக தகவல்கள் வெளியாகியுள்ளன.

இதேவேளை, அலரிமாளிகையில் கடமையாற்றும் சிலருக்கு கொவிட் தொற்று உறுதிப்படுத்தப்பட்டமையினால் ரோஹித ராஜபக்ஷ மற்றும் அவரின் குடும்பத்தார் அலரிமாளிகையில் தனிமைப்படுத்தலுக்கு உட்படுத்தப்பட்டுள்ளதாக தெரிவிக்கப்படுகின்றது.