நவீன காலத்தில் கூட்டுக் குடும்பங்கள் குறைந்து, தனிக்குடித்தன வாழ்க்கை அதிகரித்து வரும் சூழலில், ஆந்திரப் பிரதேசத்தில் கடந்த 6 தலைமுறைகளாக 83 பேர் ஒரே கூட்டுக் குடும்பமாக ஒற்றுமையுடனும் அன்புடனும் வாழ்ந்து வரும் சம்பவம் பலரையும் ஆச்சரியத்திலும் நெகிழ்ச்சியிலும் ஆழ்த்தியுள்ளது.

ஆந்திரப் பிரதேசத்தின் அனந்தபூர் மாவட்டம், குர்லபள்ளி கிராமத்தைச் சேர்ந்த நாகப்பா குடும்பம்தான் இந்த அபூர்வமான ஒற்றுமைக் குடும்பமாகத் திகழ்கிறது.

வியக்க வைத்த கூட்டுக் குடும்பம்

குடும்ப உறுப்பினர்களின் எண்ணிக்கை அதிகமாக இருந்தாலும், அனைவரும் வசதிக்காக ஒன்றுக்கொன்று அடுத்ததாக அமைந்துள்ள நான்கு வீடுகளில் வசிக்கின்றனர். ஆனால், வாழ்வியல் முறையிலும் குடும்ப நிர்வாகத்திலும் அவர்கள் ஒரே குடும்பமாகவே செயல்பட்டு வருகின்றனர்.

இந்தக் குடும்பத்தின் சிறப்பம்சம் என்னவென்றால், 83 பேருக்குமான உணவும் ஒரே சமையலறையில்தான் தினமும் தயாரிக்கப்படுகிறது. குடும்பத்தின் மருமகள்கள் அனைவரும் முழு ஒற்றுமையுடன் சமையல் உள்ளிட்ட வீட்டுப் பொறுப்புகளைப் பகிர்ந்து செய்து வருகின்றனர்.

வயது, திறமை மற்றும் அனுபவத்திற்கு ஏற்ப ஒவ்வொருவருக்கும் பொறுப்புகள் ஒதுக்கப்பட்டுள்ளதால், குடும்ப நிர்வாகம் எந்தச் சிக்கலும் இன்றி சீராக நடைபெறுகிறது. குடும்பத்தின் மூத்தோர் அனைவரும் ஆலோசனைகளின் மூலம் குடும்பத்தை ஒற்றுமையுடன் வழிநடத்துகின்றனர்.

இளைஞர்கள் விவசாயம் மற்றும் குடும்பத் தொழில்களை முழுப் பொறுப்புடனும் அர்ப்பணிப்புடனும் கவனித்து வருகின்றனர். இதனால் தலைமுறைகள் மாறினாலும் குடும்பத்தின் ஒற்றுமை மற்றும் பாரம்பரியம் தொடர்ந்து பாதுகாக்கப்பட்டு வருகிறது.

இந்த மாபெரும் கூட்டுக் குடும்பத்திற்குச் சொந்தமாக 120 ஏக்கர் விவசாய நிலமும், 4 பேருந்துகளும் உள்ளன. இவற்றின் மூலம் கிடைக்கும் வருமானம் யாருக்கும் தனித்தனியாகப் பிரிக்கப்படாமல், முழுமையாக ஒரே பொதுக் கணக்கில் சேர்க்கப்பட்டு குடும்பத்தின் தேவைகளுக்காக வெளிப்படையான முறையில் பயன்படுத்தப்படுகிறது.

இன்றைய வேகமான வாழ்க்கை முறையிலும், தனிமனிதச் சிந்தனைகள் மேலோங்கும் காலத்திலும், அன்பு, விட்டுக்கொடுத்தல், பரஸ்பர நம்பிக்கை மற்றும் ஒற்றுமையின் மூலம் ஒரு பெரிய குடும்பத்தை வெற்றிகரமாக வழிநடத்த முடியும் என்பதை இந்தக் குடும்பம் நிரூபித்துக் காட்டியுள்ளது.

இவர்களின் அசைக்க முடியாத குடும்ப ஒற்றுமை சமூக வலைத்தளங்களில் பரவலாகப் பகிரப்பட்டு, ஆயிரக்கணக்கானோரின் பாராட்டுகளையும் நெகிழ்ச்சியான வாழ்த்துகளையும் பெற்று வருகிறது.