காதலியுடன் மாலத்தீவு சென்று வந்தவுடன் முக்கிய அறிவிப்பை வெளியிட்ட விஷ்ணு விஷால்

நடிகர் விஷ்ணு விஷால், அண்மையில் தனது காதலி ஜுவாலா கட்டா உடன் மாலத்தீவுக்கு சுற்றுலா சென்றிருந்தார்.

வெண்ணிலா கபடி குழு, ஜீவா, குள்ள நரி கூட்டம், முண்டாசுப்பட்டி, ராட்சசன் உள்ளிட்ட படங்களில் நடித்து பிரபலமானவர் விஷ்ணு விஷால். இவர் நடித்துள்ள காடன், ஜகஜால கில்லாடி, எப்.ஐ.ஆர் போன்ற படங்கள் ரிலீசுக்கு தயாராகி வருகின்றன. 

 

லாக்டவுன் மற்றும் தொடர் படப்பிடிப்பு காரணமாக கடந்த ஓராண்டாக வெளிநாடுகளுக்கு செல்லாமல் இருந்த விஷ்ணு விஷால், அண்மையில் தனது காதலி ஜுவாலா கட்டா உடன் மாலத்தீவுக்கு சுற்றுலா சென்றிருந்தார். 

 

அங்கு சில நாட்கள் தங்கியிருந்த விஷ்ணு விஷால், தற்போது சென்னை திரும்பியவுடன் முக்கிய அறிவிப்பை வெளியிட்டுள்ளார். அதன்படி ‘மோகன் தாஸ்’ படத்தின் படப்பிடிப்பை பூஜையுடன் தொடங்கி உள்ளதாக அவர் தெரிவித்துள்ளார்.

 

மோகன் தாஸ் படக்குழுவினருடன் விஷ்ணு விஷால்

 

களவு படத்தை இயக்கிய முரளி கார்த்திக் இப்படத்தை இயக்குகிறார். இதில் விஷ்ணு விஷாலுக்கு ஜோடியாக ஐஸ்வர்யா ராஜேஷ் நடிக்கிறார். உண்மைக்கதையை மையமாக வைத்து உருவாகும் இப்படத்தை விஷ்ணு விஷால் தனது சொந்த தயாரிப்பு நிறுவனம் மூலம் தயாரிக்கிறார்.